Moqdisho-(Ayaamaha)-Isgooska Taleex ee magaalada Muqdisho ayaa askari katirsan ciidanka dowlada Soomaliya ayaa shalay waxa uu ku dilay wiil dhalinyaro ah oo ku shaqeesanayay Mooto Bajaajta.

Sida la sheegay askariga dilka geestay iyo Wiilka Bajaajlaha ahaa ayaa waxaa dhax maray muran la sheegay in uu sababay gacan ka hadal.
Askariga ayaa la sheegay in uu toogtay wiilka dhalinyarada ah ee muranka dhax maray, waxaana askariga dilka geestay la sheegay in uu si deg deg ah uga baxsaday goobta uu ku dilay wiilka Bajaajlaha ahaa.

C/waaxid Jibriil Afrax ayaa eheladiisa sheegeen in mudo sadex maalin ah uu aroos ku jiray , waxa uuna shalay usoo baxay sidii uu nolol maalmeedkiisa usoo dhacsan lahaa uguna shaqeysan lahaa mooto bajaajta.

Dilkan argagax leh ah ayaa noqday mid uur kutaalo iyo murugo badan ku reebtay qoyska wiilka la dilay iyo gabadha uu todobada kula jiray, waxa ay sidoo kale dhacdadan naxtinta leh noqotay mid si weyn looga hadal hayo baraha bulshada.

Mudooyinkii lasoo dhaafay Ciidamada dowlada Soomaaliya ayaa joogto ka dhigtay dilalka ay u geestaan dadka shacabka gaar ahaan dhalinyarada mooto bajaajta ku shaqeesata, waxaana intan baxsada askarta dilka u geesata dhalinyarada bajaajta ku shaqeesata.