MUQDISHO-AYAAMAHA-Dagaala xoogan oo dhexmaray Ciidamo ka tirsan Booliska dowladda Kenya iyo dagaalamayaasha Al-shabaab ayaa ka dhacay deegaan ka tirsan Magaalada Mandheera ee Gobolka Waqooyi barri ee Kenya.

Dagaalka ayaa ka dambeeyay, kadib markii Al-shabaab ay weerar ku qaadeen Kolonyo ay la socdeen Ciidamo Milateri ah kana tirsan Kenya, xili ay socdaal ku marayeen inta u dhexeeysa Lafey iyo degmada  ceel waaq  kenya  sidaasina  uu dagaalka ku bilowday.

Saraakiil ka tirsan Booliska Kenya oo la hadlay warbaahinta ayaa u sheegay in dagaalkaas uu ka dhashay Khasaaro isugu jira dhimasho iyo dhaawac oo soo kala gaaray labada dhinac.

Sarkaal Boolis ah ayaa sheegay in Al-shabaab ay ka dileen 5 dagaalame, halka kuwo ay ka dhaawaceen, sidoo kalena dhankooda uu ka geeriyooday hal Askari, laba kalena ay dhaawacyo Culus kasoo gaareen, isagoo xusay in dhimashada dhankooda ay korortay.

Dadka deegaanka ayaa soo weriyay in Ciidanka Milateriga ahaa ee weerarka lala eegtay ay kusii jeedeen Garoon diyaaradeed, isla markaana dagaalka dhexmaray labada dhinac uu socday muddo ku dhow hal saac.

Dhinaca kale war ka soo baxay al shabaab ayay ku sheegatay weerarkaasi iyaga oona sheegay in weerar  toos ah ay  ku qaaden  ciidamo boolis ah ku sugnaa inta udhaxaysa tuulooyinka Harwaleey iyo Dabaasiti oo hoostaga degmada Mandhaara.