Wararka ka imaanaya deegaanka Daarusalaam ee gobalka Sh/goose ayaa sheegaya in xalay saqdii dhexe uu halkaasi ka dhacay dagaal u dhaxeeyay Ciidamo Ajaanib ah iyo kuwa Somali ah iyo Alshabaab oo dhinac ah.

Dagaalkaan ayaa waxaa uu yimid kadib markii diyaarado dagaal iyo ciidamadaan khaaska ah ay ku degeen deegaankaa Daarusalaam oo ay maamulaan Alshabaab,hase’ahaatee waxaa la sheegay in Shabaabku markii ay maqleen dhawaqa diyaaradaha in ay ridden hub culus iyada oo ciidamadaasna la sheegay in ay gudaha u galeen deegaanka Darusalaam.

Dadka deegaanka Daarusalaam ee gobalka Sh/goose oo diiday in magacooda iyo codkoodaba loo adeegsado warbaahinta sababbo dhinaca amniga ayaa sheegay in jug xooggan ay xalay ka dhaceysay deegaanka kuna baraarugeen guuxa diyaaradaha dagaalka iyo dhawaqa rasaarta culus.

Ilaa hada majirto cid xaqiijin karto khasaaraha rasmiga ah ee ka dhashay howlgalka ciidamadaan Ajaanibta ah iyo kuwa Somalida xalay ay ka fuliyeen deegaanka Daarusalaam ee gobalka Sh/hoose.

Alshabaab ayaa sheegay in ay iska difaaceen weerar ciidamo Maraykan ah ay ku soo qaadeen Daarusalaam,in kasta oo ilaa iyo haatan aysan ka hadlin dowladda Somalia iyo Maraykanka oo la aaminsanyahay in ay masuul ka ahaayeen howlgalkaan qorsheysan.