Ciidamada Ammaanka ee Dowladda Soomaaliya ayaa gacanta ku soo dhigay koox ka tirsan Al-Shabaab ee dilalka ka fulin jirtay degmooyinka Dharkeenley iyo Wadajir ee magaalada Muqdisho.

Kooxdan ka kooban saddex nin oo dhalinyaro ah ayaa xalay lagu soo bandhigay Saldhigga degmada Wadajir, waxaana la sheegay in kooxdan la soo qabtay, xilli ay doonayeen inay toogtaan Haweeney qaad iibineysay oo ka mid aheyd ergooyinkii soo doortay Xildhibaanada Maamulka Hirshabeelle.

Dhalanyaradaan ayaa qirtay inay ka tirsan yihiin Al-Shabaab, waxaana ay ku howl galayeen Mooto bajaaj, xilliga ay doonayeen inay dilaan haweeneyday waxaana u dhici weyday bastooladii.

Magacyada Ragaan ayaa kala ah Shuceyb C/llaahi Xaaji oo loo yaqaano Maxamed, waxaa uu sheegay inuu Al-Shabaab u qaabilsanaa degmada Wadajir, waxaana uu dalbaday in la cafiyo.

Sidookale Ninka labaad ayaa lagu magacaabaa Ismaaciil Maxamed Aweys oo naaneystiisa loo yaqaano yaxye ayaa sheegay inuu Al-Shabaab u qaabilsanaa dilalka degmooyinka Dharkeenley iyo Wadajir.

MIdka saddexaad ayaa lagu magacaabaa Maxamed Cusmaan Macalin oo loo yaqaano C/weli ayaa sheegay inuu Al-Shabaab u qaabilsanaa u kala gudbinta Hubka ayaa sheegay inuu hubka u geynayay dadkii fulin jiray dilalka, isagoo isticmaali jiray Mooto bajaaj.

Haweeneyda ka badbaaday falkan ayaa uga mahad celisay Ciidamada Booliska qaabkii ay raggan gacanta ugu soo dhigeen, isla markaana ay aheyd hooyo todobo carruur dhashay, waxaana seygeeda ahaa askari ka tirsan ciidanka Booliska.

Guddoomiye kuxigeenka Amniga Gobolka Banaadir Maxamed Tuulax ayaa sheegay in raggan ay muddo sanado ah dilalka ugu badan ka fuliyeen degmooyinka Wadajir iyo Dharkeenley.

HALKAAN HOOSE KA DAAWO