Duqa Muqdisho ahna Guddoomiyaha Gobolka Banaadir Cabdiraxmaan Cumar Cusmaan (Eg.Yarisow) ayaa guddoomiyey Shirka Tubta Gobolka Banaadir oo looga hadlay Qorshaha Amniga Caasimadda Muqdisho, Awoodsiinta Dhalinyarada ee hirgelinta Is-Xilqaan iyo horumarka Caasimada.

Yarisow ayaa sheegay in la xoojinayo isla xisaabtanka dhammaan qeybaha Maamulka, isagoo ugu baaqay in si dhow loola shaqeeyo Hay’adaha ammaanka ee ku howllan ka hortagga falalka argagixisadu u maleegayaan shacabka Soomaaliyeed.
Guddoomiyaha ayaa xubnaha Maamulka ee kulan ka qeyb galay uga warbixiyey isbadalka dhinaca ammaanka ee lagu sameeyey Caasimadda, waxuna ka codsaday shacabka ku nool Muqdisho in so dhow loola shaqeeyo Ciidanka Amniga.
Duqa Muqdisho ayaa sheegay in meel wanaagsan uu marayo barnaamijka Isxilqaan ee dalka lagu dhisayo, waxuna uga mahadceliyey dhalinyarada doorka wanaagsan ee ka qaadanayaan dib-u-dhiska, isla markaana uu Maamulka Gobolka Banaadir ahmiyad gaar ah siinayo shaqo abuurka dhalinyarada iyo in kaalin wanaagsan ay ka qaataan horumarka dalkooda.

Intii uu Shirka socday ayaa waxaa warbixin ku addan horumarinta Waxbarashada Gobolka Banaadir iyo sidii uu Maamulku door fir-fircoon uga qaadan lahaa, waxaa laga dhageystay Wasiirka Waxbarashada Xukuumadda Federaalka Soomaaliya Mudane C/laahi Goodax Barre.

Madaxda Heer Gobol iyo Heer Degmo ayaa si dhaw u falaanqeyey miro-dhalka Barnaamijyada muhiimka u ah Adeegyada Asaasiga Bulshada ee laga hirgelinayo Gobolka Banaadir, caqabadaha jira iyo sidii loo sidii loo dardargelin lahaa.