Madaxweynaha Puntland Siciid Cabdullahi Deni ayaa beesha Caalamka ku dhaliilay iney soo gaarin taageerada ay ku bixiso magaca Soomaaliya.

Madaxweyne Deni ayaa sheegay in maamulkiisa dhibaato farabadan uu ku qabo Kooxaha Shabaab iyo Daacish, kuwaasoo uu sheegay iney ku soo qulqulayaan deegaanada Puntland, iyagoo ka soo talaabaya dhanka baddaha.

Si arrimahan looga hortago, ayuu Mr Dani talo ahaan u soo jeediyay in maamulkiisa lagu garab istaago sidii meesha looga saari lahaa Kooxaha argagixisada oo saldhigyo waaweyn ka sameystay buuraleyda gobolka Bari.

“Waxa ugu weyn ee maanta Soomaaliya la rabo in laga taageero waa Nabadgelyo, waa Cadawgii oo hada ka soo tallaabaya badda oo Ajaanib leh oo soo galaya buuraha bari ee Puntland iyo cadaw deegaano kale ka imaanaya oo raba in midnimada iyo wadajirka puntland ay wiiqaan, arrimahaasoo dhan waxey u baahan tahay difaac adag” ayuu yiri Madaxweyne Deni.

“Waxaan aad uga xumahay in hub aad u fara badan oo Soomaaliya loogu deeqay uusan Puntland soo gaarin, iyadoo ah meesha kaliya oo ilaalisa midnimada Soomaaliya, hor istaagtay cid kasta oo damac ka gashay Soomaali in wixii ay mudneyd aysan helin waxa ugu weynn annaga xisaabta aan gelin doono waxaa ka mid ah in xuquuqda Shacabka iyo Ciidanka la helo” ayuu hadalkiisa sii raaciyay madaxweynaha.

Hadalkan ayaa Madaxweynaha Puntland uu ka jeediyay Xerada 54aad oo ah taliska guud ee ciidamada difaaca Puntland ee ku taalla duleedka Garowe.