Muqdisho-(Ayaamaha)-Iyadoo maalmihii la soo dhaafay Baraha Bulshada iyo Wabsite-yada qaarkood lagu faafinayey in Dowladda Soomaaliya ay ku amartay Shaqaalaha Hay’adda Gurmadka deg dega ah ee Aamin Ambulance Shaqada laga joojiyey, ayaa waxaa warkaasi beeniyey taliska Ciidanka booliska Soomaaliyeed.

Sareeye guute Zakiya Xuseen Axmed Taliye kuxigeenka Ciidanka Booliska Soomaaliyeed ayaa sheegtay inaysan jirin Shaqa joojin lagu sameeyey Gaadiidka gurmadka deg dega ee Aamin Ambulance,isla markaana ay Booliska wadashaqeyn la yeelan doonaan.

“Booliiska Soomaaliyeed wuxuu caddeynayaa in aysan jirin xayiraad la saaray hay’adda gaarka loo leeyahay ee Aamin Ambulance,Hay’adda Booliiska iyo Gobolka Banaadir waxay yeesheen kulan lagu lafa gurayo sidii wada shaqeyn dhaw loo yeelan lahaa, waana sii wadi doonnaa dadaallada lagu mideynaayo hawlaha gurmadka.

Waxaa Sidoo kale ay uga mahad celisay mas’uuliyiinta Hay’adda Aamin Ambulance iyo cid walba oo gurmadka degdeg ah ka shaqeyso xilkasnimada iyo dadaalka ay muujiyeen,waxaana ay sheegtay inay rajo weyn ka qabaan in si wadajir ah loo wajaho xaaladaha degdeg ah ee yimaada.

Aamin Ambulance ayaa ah mid si gaar ah loo leeyahay,waxaana ay ka Shaqeysaa u gurmashada dadka ku waxyeelooba qaraxyada iyo musiibooyinka kale ee ka dhaca Magalada Muqdisho.