Muqdisho-(Ayaamaha)-Urur-gobaleedka IGAD ayaa shalay soo saaray Qoraal ay ku soo dhaweynayaan go’aankii ay Dowladda Belgium ku aqoonsatay Baasabooradda Diplomaasiyiinta iyo Shaqaalaha ee Somalia.

Maxbuub Maalim oo ah Xoghayaha Fulinta IGAD, ayaa tilmaamay inay Tallaabadaasi tahay mid muhiim ah oo muujinaysa sida ay u kordhayso Kalsoonida ay Beesha Calaamka ku qabaan DFS iyo Hay’addaheeda.

Sidookale waxa uu xusay in Tallaabada Aqoonsiga Dowladda Berlgium ee Baasabooradda Diplomaasiyiinta iyo Shaqaalaha ee Somalia ay aad u xoojin doonto Xiriirka labada dal iyo in Saraakiisha DFS fursad u heli doonaan inay la xiriiraan Hay’addaha Midowga Europe ee fadhigooda ku yaallo caasimadda dalkaasi ee Brussels.

Maxbuub Maalim ayaa xusay in Aqoonsiga Belgium ee Baasabooradda Diplomaasiyiinta iyo Shaqaalaaha Somalia horseedi doonto inay aqoonsadaan Baasabooradda caadiga ee dalka Somalia.

Dhinaca kale, waxa uu ku booriyey dalalka kale ee haray inay aqoobnsadaan Baasabooradda ay DFS soo saartay iyo in ay taageero ka geystaan  dedejinta Fiisaha ee Muwaadiniinta Soomaaliyeed.