Muqdisho-Ayaamaha.com Waxaa maanta magaalada Muqdisho ka furmaya shir u dhexeeya Dowladda Federaalka Soomaaliya iyo siyaasiyiinta mucaaradka ee Madasha Samatabixinta Soomaaliyeed.
Shirka oo ay dhex-dhexaadinayaan wakiillo ka socda dowladda Turkiga ayaa waxaa diiradda lagu saaraya arrimaha siyaasadda iyo hannaanka doorashooyinka dalka.
Kulankan ayaa la filayaa inuu noqdo mid muhiim u ah yareynta khilaafka u dhexeeya dowladda iyo mucaaradka, maadaama labada dhinac ay muddooyinkii dambe isku hayeen hannaanka doorashooyinka iyo jihada geeddi-socodka siyaasadeed ee dalka.
Sida ay sheegayaan wararka la helayo, xubnaha Madasha Samatabixinta ayaa kulanka ku soo bandhigi doona aragtidooda ku aaddan nooca doorasho ee xilligan ka qabsoomi karta Soomaaliya, kadib markii ay hore u diideen qorshaha doorashada qof iyo cod ee ay wado Dowladda Federaalka.
Wararka ayaa sidoo kale tilmaamaya in mucaaradku dib u eegis ku sameeyay qaar ka mid ah mowqifyadii hore ee ay ka qabeen arrimaha doorashooyinka, iyadoo la sheegay inay soo diyaariyeen hindise la xiriira hannaan doorasho oo ay u arkaan mid dalka ka hirgeli kara xilligan.
Dhanka kale, wafdiga Turkiga ee dhex-dhexaadinaya wada-hadalladan ayaa saacadihii u dambeeyay soo gaaray magaalada Muqdisho, iyagoo wada kulamo hordhac ah oo ay la leeyihiin dhinacyada siyaasadda, si loo abuuro jawi ku habboon wada-hadallada.
Kulankan ayaa ku soo beegmaya xilli Soomaaliya ay wajahayso muran siyaasadeed xooggaan oo ku saabsan hannaanka doorashooyinka. Si kastaba, indhaha ayaa lagu hayaa natiijada kasoo baxda wada-hadalladan, maadaama ay saameyn ku yeelan karto jihada siyaasadda dalka iyo heshiis laga gaaro hanaanka doorashooyinka.
