MUQDISHO-AYAAMAHA-Ra’iisul Wasaaraha Xukuumadda xilgaarsiinta ee Soomaaliya Maxamed Xuseen Rooble oo xalay ku hooyday Magaalada Qaahira ee dalka Masar ayaa halkaasi waxaa uu ka bilaabay kulamo kala duwan oo uu la qaadanayo Madaxda dalkaas.
Shalay Gelinkii dambe Ra’iisul Wasaare Rooble oo ay wehlinayeen qaar kamid ah Golihiisa Wasiirada ee la socda ayaa waxaa ay kulan la qaateen Ra’iisul Wasaaraha dalka Masar Moustafa Madbouly iyo mas’uuliyiin kale.
Saacadaha soo socda ayaa waxaa la filayaa in Ra’iisul Wasaaraha Soomaaliya Maxamed Xuseen Rooble in uu la kulmo Madaxweynaha dalka Masar Cabdifitaax Al-siisi, iyaga oo ka wada hadli doono arrimo ku saabsan xiriirka labada dal.
labada dal ee Masar iyo Somalia ayaa sanadihii dambe waxay ahaayeen kuwa aan isku wanaagsaneyn tan iyo markii uu xilka qabtay Madaxweynaha Somalia Maxamed Cabdulaahi Farmaajo.
Booqashada rasmiga ah ee Ra’iisul Wasaaraha iyo wafdigiisa ay ku joogaan dalka Masar ayaa qaadanaysa muddo 3 maalmood ah, taas oo kulamo kala duwan uu la qaadanayo madaxda iyo masuuliyiinta ugu sarreysa dalkaas.
Ra’iisul Wasaaraha Xukuumadda xilgaarsiinta ee Soomaaliya Maxamed Xuseen Rooble ayaa inta uu ku sugan yahay dalka Masar kulamada sii wadi doona, iyada oo Maalinta Berito ah gelinka dambe uu soo geba-gabeyn doono booqashada uu ku joogo dalka Masar.
