MUQDISHO-AYAAMAHA-Dagaal gacan ka hadal ah ayaa waxa uu dhax maray Xildhibaano katirsan Baarlamaanka dalka Kuwait, Xildhibaanadan gacmaha iskula tagay ayaana kala ahaa kuwa muxaafid ah iyo kuwa kale oo mucaarad ah oo kasoo horjeeda.
Xildhibaanada ayaana isku dhax feeray Xarunta Dhexe ee Barlamaanka dalka Kuwait oo ku taalla caasimadda Kuwait City, waxaana la arkayay xildhibaanada oo isla dhacaya feer iyo haraanti.
Isku dhaca Xildhibaanada Muxaafidka iyo kuwa Mucaaradka ayaa yimid, kadib, markii cod loo qaaday Miisaaniyad-sanadeedkii 2020-ka ilaa 2021-ka oo ay Xukuumadda dalkaasi soo gudbisay.
Warbaahinta dalka Kuwait ayaa ku warantay in Xildhibaanada Mucaaradka ayagu bilaabeen Dagaalka iyagoo gacanta ula tegay Xildhibaanada Muxaafidka ee taabacsan Xukuumadda dalkaasi.
Ciidamada booliiska u xil saaran Ammaanka Golaha Barlamaanka ayaana kala dhex galay labadii Garab ee dagaalantay iyadoo Amarka iyo Nidaamka dib loo soo celiyey, kadib daqiiqado xarunta Baarlamaanka isku bedeshay meel foodo ah.
