Wasaaradda Amniga Oo Joojisay Hubkii Lala Geli Jiray Garoonka Aadan-Cadde

21

MUQDISHO-AYAAMAHA-Wasaaradda Amniga Xukuumadda Federaalka ah ee Soomaaliya ayaa shaacisay in la joojiyay hubka lala galayo gudaha garoonka Diyaaradaha Aadan Cade ee Magaalada Muqdisho.

Qoraal kooban oo kasoo baxay Wasaaradda Amniga ayaa waxaa lagu shaaciyay Go’aankaas, iyada oo dhinaca kale la sheegay in Go’aankaan uusan saameyn doonin ilaalada madaxda Sare ee Qaranka.

“Waxa kaliya loo ogolaaday iney hubka la gelin karaan ilaalada madaxweynaha JFS, Ra’iisal wasaaraha JFS, Guddoomiyeyaasha Labada Aqal ee Baarlamaanka Soomaaliya” ayaa lagu yiri qoraalka ka soo baxay Wasaarada.

Garoonka diyaaradaha Aadan-Cadde ee Magaalada Muqdisho ayaa ah kan ugu Shaqada badan Garoomada ku yaal Soomaaliya, waxaana amnigiisa ilaaliya Ciidamadda Dowladda Soomaaliya iyo kuwa AMISOM.

Go’aankan kasoo baxay Wasaaradda Amniga Xukuumadda Soomaaliya ayaa waxaa uu kusoo aadayaa xilli la galay waqti doorasho, isla markaana xubno ay kamid yihiin Midowga Musharixiinta ay ilaaladooda la galaan Garoonka markii ay dhoofayaan ama dano kale ay ka yeeshaan.